By- Pa H.Thawngkhandou
Pathian in khovel/leitung a siam zoh in Huan kilawm tak Eden Huan kichi munkhat ah a siam a, hoih leh poimoh asak na mun tak ah mihing a siam a, Pasal ahi a, a min ding in Adam a phuak a. Tua nunglam in a nagihtuaha a et et leh amah kia nuamsa lou di leh kin zoulou di ahi,chiin,a kithuahpih dia kilawm ka bawlsak ding chiin, Adam ihmut lim tak in a ihmu sak hithit a, a ihmut kal in anak guh khat a dok khia a, Adam in amuh tak in hiai hial zaw ka guh bang guh nei,ka sa bang sa nei ahih ziak in, Pasal a kipan a lakkhiak ahi ngal a Numei chih ding ahi ding achi hi. Huchiin anih un nuamtak in a khawsa khawm ta uhi. Tua Eden Huan sung ah singgah nektheih chikim omte a duh lam lam uh nek theih ding om a, huan laizang ah luiluang li I(4) a luangsak a, khatna ah – Pison lui, nihna ah – Gihon, thumna – Hidekel ahi a, huan, a lina pen Euphrates lui ahi. Huan, huan laizang tak mah ah sing mithip tak – sia leh pha theihna singkung a om hi. Tua hun in amau gel vuaktang ahi ua,himahleh a zum tuan kei uh, a huchidi mawng hi a a ki ngaihtuah ziakun. Huan Pathian in a kiang uah ,”hiai huansung a singgah tengteng zaw na nethei vek ding uh achi a, hiai huan laizang a pen sia-leh-pha theihna singgah pen zaw na nethei kei ding uh, na nek ua leh na nek ni ni un na siding ub a chi hi”
Tua Eden Huan ah nitaklam ninem hun in Pathian in Adam te nupa a va verh zel a, nuam leh khamuang takin a ki houlim zel uhi.
Himahleh vangtah huai tak leh khasiat huai tak in nikhat tuh Setan in ganhing lak lak a pilkhel pen hi a atheih gul zangin Evi kiangah a va hoh a, nou hiai huan sunga singgah tengteng na nethei vek uh maw? a va chi a, Evi in ‘Hi, nethei ma hung, ahih ziakin huai huan laizang a pou sai-leh-pha theihna sing zaw ka nethei kei uh, Pathian in huai pen zaw na nethei kei ding uh, na nek uleh na nek ni ni un na si ding uh ahon chi a ka ne ngam kei uh” a chi hi.
Huan Setan in, si zenzen lou e, sih nak sang in huai ne le uh chin,na mit uh a hong vak dia ,sia leh pha, a sia a pha non thei ding ua na hong pil ding uh, Pathian in huai ding a lauh ziak a hon phallouh ahi. “Ne un, na si kei hial ding uh” a chita hi. Huai tak in Evi in singgah tuh limchi diak kholin a muta a, a duh muhta mai a, a loua, a pasal leng a hawm a, a netuak ta uhi.
Tua zoh lamin Pathian in huai thu thei in nidanga ahoh bang thou in huan ah ava hoh ta a, “Adam,Adam,chia a va sap leh ana kibuta mai ua, vuaktang ahih uh kitheia theipi nah te khuia tengin an kibuta uhi. Pathian in a samzel a, Adam! Adam! Koi aom na hia?” achi a, Adam in,”Vuaktang a om ka hih uh ka ki thei ua ka zak ta ua ka kibu ta mai ua ahi a chi a,”huan, Pathian in,”Vuaktang na hih lam uh kuan hon hilh a hia, singgah nek louh ding kachih ne na hi uh maw?” a chi a, Huan Adam in,”Ka ompih dia non numei piakin singgah louin honpia a, ne keita ve” a chi a, huan, numei kiangah a dong nawn a, Numei in, gul in hon khem a kaneta mai uhi. Huai tak in Pathian aheh mahmah mai a, hichiin a chita hi. Tua pan in na sithei ta ding uh, lei a bawl na hi ua lei ah na kik ding uh. Lou leh louling nei lak ah kho-ul luang puappuap in nek na zong ta ding uh” a chia. Eden huan apan in a hawlpawt ta hi. Huan Evi kiang ah “Tua patin nanau neihna hih haksat in a omta ding,” a chi hi. Huan, Gul kiangah,”nang gul, tua kipan in na kam a leivui lut a kitholh in na paita ding a, Nang, Numei suan a khetul na tu sidup ding a, Numei suan in na lu a khen sidup ding” a chi a. Huan, den leh huan sunga va lut in a khut un hinna singgah valou in ane ding ua a hing nilouh kha ding uh chih na ziak in huan lutna kongtung ah Angel nih temsau lek zual zual in a koih hi (a duty sak hi). Huchiin Huan pawlam ah nek muhna dingin leiletin na a sem panta uhi.
TATNA NNA KIPATNA
Huchiin Pathian in, mikhial tuh a si dinga chih khelkik thein awn louin, hiai hun apatin mi tengteng a ding in sih tuh maban ahita mai hi. Huchiin Pathian leh mihing khalam a hinna kizopna lei (bridge) tuh a kitan ta hi.
Himahleh, Pathian in a ngaihtuah thak thak chiang in, mihingte Mosi kianga dan a piak dungzui a lah siamtang zou ding om mellou, a mi siamte kisuang sawn sawn te teng si a mangthang vek ding ngaingam lou in mikhial si ding chih lah khelkik theih vual hi nawnlou ahih ziak in lemgel siam tung Pathian in, mikhial si ding chih suk tangtunna dingin mohna neilou pi a tapa it mahmah, a tapa tang neihsun Toupa Jesu tuh khelhna a bawl in eite (Nang leh kei) sik leh tangin mi engbawlna chiteng thuak mualsuah zouin, mualphou huai tak in Kalvari sing Khros tung ah a hong sisak ta mai hi, ana ngei! I thuakpih uh aw! A hong tatna simthu ah lah kipah huai mah leh, za-a-za mihinna aneih na tungtawna hong thuak ahih mawk ziakin (Johan 3:16).
KALVARI ZOHNA THUPI
Khovel gamteng Toupa leh Khrist gam di’n sual douna gal zoutu mangin sisan luangin a man zouta, kalvari tang ah kilepna’n vanmang ta mel hong mual. Tu zet in tuh numei suan , Mari sunga hong piangin gul (Setan) lu vualzou takin Kalvari tang ah a khen sidup petmah ta hi. Ei sih ngai nawnlou, tatna ki zouta, thei siam mah mah dingin i lungsim ngaihtuahna chiat uah khasiangthou in hon panpih mahmah hen.
Huchiin a gingtu leh Hondampa a pomte toh han a vuikhawm a om in a nithumni a han apan vualzoua a Pa – Pathian in a kaihthoh na ah leng i thou nawn khawm ta mai uhi, Hallelujah! Kipah huai e khutbeng in kikou zua zua ni!!! Tu’n ei dia gensak in van ah Pa taklam ah a hongpai nawn ding hun ngakin a tu liuliau ta hi. Thupi ei.. Pathian i phat! Pathian kia in thupina tang tawntung hen.
THUKHITNA LUNGMUAN HUAI
Ka unau itte aw, tu’n tatna nna lah ei hon tanpa leh hon Hondampa Khrist Jesu in honna sep zoh sakta a, a bullam a I gen, I khelhna ziak amihingte leh Pathian kizopna lei (Bridge) kitan kha tu’n hiai tatna kizouta ziakin lei leh van kikal ah i Toupa Khros tuh a hong kidoh gal kai ta a, tua tawnlou in kuamah Pa kiang tunglou ding hi, Johan 14:6. Den a igen huai lei kitan leng a hong kizom nawnta hi. Eite tuh khalam Salem thak ah i leng ta uhi. Eden Huan nuamtak mihingte i khelhna ziak ua luahthei nawnlou a noh khiak a na om himah le hang Khrist tatna sisan luang, moh sian na itna tui a a Luanna ziakin huai Eden Huan a khelhna portion tuh khuh manga omin khelhna om ma a Eden Huan a Pathian in mihingte a va vehna portion leh Kalvari vaualzohna Salemthak tuh hong kizom theita hi, huchiin, “Eden leh Salem thak kizom” PNGL No. 1 na 4 stanza (b) chih tuh i lungsim ah kha in hon theisakin hiai la “Eden leh Salem thak kizom” chih tuh atak tak in kipak takin isakhe thei petmah ta hi. Khasiangthou panpihna in.
Toupa’n a thu vualzawl hen. A simkhate leh a lunglut peuhmah tung ah.
