Pu T. Thangkhai, Pearsonmun Hausa in 2-04-1946 in Pearsonmun khua sat in inn masapen ding in, Biakin a lam hi.
EBCC Pearsonmun in Pathian pina leh vualzawlna simseng louh kitang hi. KUM 2021 in Pearsonmun khua Kum 75 chingta ding hi. “TUTAN TOUPA’N HON PI”
Tulel a Pa Thuamzalian tenna innmun ah Biakin masa lam ahi a, tuahun in atung ding bi zang a lam ahi. Upa Ordained masapen Upa T. Gousing leh Upa M. Manggou te ahi uh. Amaute Ordained sa a lut ahi uh. Amaute panpih ding in January 1948 in Upa panpihtu (tua Tual Upa ichih) ding in 1. Pa Vanlalau 2. Pa Kapthang 3. D.Vungchin te ahi uh. Tuni tanin Pathian vualzawlna toh saptuam leh khua khangtou zel in Upa Ordained 35 vel pha a theih ahi.
Biakin masa ah kita zounawn lou leh saptuam mi pung hiaihiai ahih man in amun ki bang (tua Pa Thuamzalian innmun) mah ah Biakin keklet ahi, a tung ding in bi mah zat ahi.
Pathian vualzawlna in Pearsonmun Evangelical Convention Saptuam member apun zel ziakin biakinn (Club muna) pen kidaih huntawk a ki theih nawnlouh ziakin Saptuam Upate leh mipi adia kidaihzaw leh alian zaw Biakinn dinsuah poimoh kisa hi, huai dungzuiin Biakin thak lamnang in Building Committee ding 7th March 1969 ni in akiphutkhia hi. Biakinn thak foundation suang puak, 15th March 1969 ni a pat ahi.
Amaute a nuai a bang ahi uh:
OFFICE BEARERS:
MEMBERS:
Hiangkot gam, Zawnngek lui ah, biakinn sing ding ava ki-at hi. Singatte paw khe ding in tangval 70/80 vel agam ah giak in ava ki paw khia a, alampi tou mahmah ahih man in a tangtung a puak khiak ding a huphulh huai petmah hi. A lampi tou lua ahih man in liang a leng puak theih louh in nungzang a pua in numei tengteng in khau a kai in tha neih tengteng a pan akilak nung in tangtung aki tun thei hamham a ki gimlua chiat ahih man in kuamah pauzou leng omlou in tangtung ah ki thallup phengphung mai hi. Huchi in tangtung a singte sekhawm in innlam ah aki paisan a, zingchiang in gari in pawni chi in zan in inn ah ava ki tawldam hi.
A zingchiang in Pu Lianmang in truck nei ahihchiang in amah a ava kinget leh, “E, huchia poimoh ahih leh ka gari ka hon thoh ding” achi a, huchi in kipaktakin a gari toh aki kuan tou ngal hi. A sing mun ka va tun tak un singnuai ah mei kitoh nasa meivu khong ana om in kuate hiam in haal ana sawm uh hiding in gingtakna lianpi om hi, hileleng vangphat huaitakin a singte ana kang se kei hi. Huchi in gari ah singte ka hon load panta ua, a singte a let ban ah asau luat ziakin abuai huai mahmah hi. Lampi akawi luat ziak in a sing te’n lamsak dawt khazel ding dan in a om a, neuchik hihkhial le kawl ah lengkhiak theih di dan dinmun in a om hi. Driver pa Luna in a et chiangin huphulh huai asa a, “Ken zaw ka hawl ngam mahmah kei, kawl ah ka lengkhe ding” achi hial hi. Huchi a mangbang taka aki omlai in U Ginkhotual in, “Sih leh sih, dam leh dam, ken ka hon ensin di” a chi a kakipak mahmah uh a, hileh leng kawl ah lengkhe kha leh chih ka ngaihtuah chiangun kipak law napi in ka dip uh a hawm mahmah hi. Huchi in kuamah a pau ngam leng ka om louh lai un aman gari hon start a awl chikchik a pai in guam gal ahon kaipih thei hi. Kakipak luau a “Dam I hi! Dam I hi!” ka ki chi souhsouh uhi.
Gari zatdia hon thoh tu leh gari hon hawlkhiak sak tute tungah kipahna alian in mangngilh ni a om ngeikei ding. Huchi in awl chikchik a pai in mipi ten a nung zui in innmun ka tun thei ua Pathian kiang ah kipah thu ka gen uhi. Singpuak khiak lai a gimna tuni tan chiang in leng I khonung ngaihtuah khak chiang in gimhuai leh tawlhuai bang aki sa lailai hi.
Biakinn hongtu in Pastor P.K. Englian pang hi, tua biakinn zatlel kiluah 8th August 1976 vel hi a chiamteh ahi. A laklak a puahtou zel in awm a tutan in le Biakna ding a zattouh hi lai ahi.
Khosung le lian huntawk ta, Pathian vualzawlna ziakin saptuam mipite biakin khat ah kitanawn lou leh vengkhang lamte a dia naih haksata ahih man in, Upa Thupukna bang in, 27th September 2003 Kum in vengkhang ah Biakin hongna neih ahi, Biakin min ding in, EBCC Moria Pearsonmun phuah ahi. Tua hun ah biakin hongtu in Rev. Thangsuan, Director of Ministry pang a a lantu in Rev. N. Vungzasin, D.S Lamka District pang hi. Tua hun a Upa Ordain sate 1. Upa T. Thuamkhopau 2. Upa Kamdoulian 3. Upa M. Ginzalian 4. Upa M. Kamzatun 5. Upa Gouzalam 6. T.Ginkam 7. Upa Chinzam 8. Upa K. Ginkhanthang leh 9. Upa Lamkhanthang te ahi uhi.
1953 in Dorka pawl kiphuh khia a anuai a te founder member ahi uh.
Naupang pawl 1947 lak vel a kiphuhkhia hi a theih ahi. Naupang nipi skul kisinsak na ding in inn lianlou kizang hi
Tuailai pawl 1966 – 1967 hiai gel khat zaw samsam khat ah kiphuh khia hi a theih ahi.
Missions nnasepna lam hatsem na ding in 1972 kum a ki phutkhia hi a theih ahi.
(Khenkhat ordain sa a hon lut le awm hi.)
NUMEI –
PASAL -
© 2021 Evangelical Baptist Convention Church (EBCC) Pearsonmun. All rights reserved. Site maintain by Media Team.
